Reconeissença vocala en occitan

(gascon e lengadocian)

Las tecnologias de la lenga – reconeissença vocala, sintèsi vocala, traduccion automatica o encara l’analisi semantic – constituisson un enjòc vital per las lengas minorizadas.
ReVOc es un programa novèl de desvolopament de la reconeissença vocala en occitan (varietats gascona e lengadociana) engatjat pel Congrès permanent de la lenga occitana.

La reconeissença vocala permet la transcripcion de la votz en tèxte, una tecnologia qu’es d’ara enlà difusada en abonde dins d’aplicacions grand public, mai que mai pels assistents personals (Siri d’Apple, Google Home o encara Alexa d’Amazon pels mai coneguts), sostitolatge automatic de videos, e tanben ajuda a la transcripcion de collectatges.

S’estima a aperaquí 200 oras lo besonh de transcripcions e a 500 milions de mots lo còrpus textual necessaris per cada varietat. L’occitan es una lenga encara tròp chic dotada, comptam doncas amb la participacion del mai grand nombre de locutors per afortir la preséncia de la lenga dins l’espaci numeric.

Aquel programa triennal (2020-2022) se debana dins l’encastre d’un partenariat transfrontalièr qu'assòcia l’institucion aragonesa Rolde de Estudios Aragoneses (que desvoloparà la meteissa tecnologia per la lenga aragonesa) e la fondacion basca Elhuyar (en carga de la partida tecnica del programa), benefícia del sosten financièr de la region Novèla Aquitània, de la region Occitània e del departament dels Pirenèus Atlantics.