Podètz ajudar Lo Congrès a bastir la primièra reconeissença vocala occitana en li mandant vidèos en occitan sostitoladas en occitan.

Lo projècte ReVOc del Congrès permanent de la lenga occitana a per tòca de desvolopar la primièra reconeissença vocala per l'occitan.

La reconeissença vocala es l'otís que permet als ordenadors de passar la votz a l'escriut. Es utilizada, per exemple, dins la transcripcion o lo sostitolatge automatic de vidèos, pels assistents personals dels telefonets...

Per entraïnar l'intelligéncia artificiala que servirà a desvolopar la reconeissença vocala, Lo Congrès a besonh d'un fum de donadas modèles, es a dire de frasas enregistradas amb lors transcripcions escriutas.

Un biais d'ajudar Lo Congrès a constituïr aquelas donadas es d'anar enregistrar de frasas sus la plataforma dedicada.

Mas podètz tanben mandar de fichièrs vidèos o audios vòstres amb lors sostítols (de sostítols en occitan en grafia classica amb las informacions temporalas) a l'adreça info@locongres.org, amb un corric qu'indica que nos balhatz l'autorizacion de las utilizar en intèrne tà entraïnar l'intelligéncia artificiala (demoraràn privadas, seràn pas jamai faitas publicas sens vòstre acòrdi).

Es un bon biais de tuar dos aucèls d'un trait : ajustatz de sostítols en occitan a vòstras vidèos (es important per exemple suls malhums socials, que lo monde i van de mai en mai dins de moments que pòdon pas activar lo son) e ajudatz Lo Congrès a bastir d'otísses per, mai tard, ajustar aqueles sostítols automaticament.

Mandatz al Congrès lo fichièr vidèo/audió amb los sostítols occitans (se i a los franceses en mai, nos interèssa tanben per far de còrpus bilingües). Lo Congrès los trocejarà frasa per frasa, los alinharà amb lors transcripcions e los utilizarà per bastir la futura reconeissença vocala.

Se sabètz pas cossí sostitolar de vidèos, vos avèm preparat una notícia qu'explica cossí far.